SOBRE ESTA PRESENTACIÓN

Achégate a coñecer “Chanoyu”, a cerimonia xaponesa de preparación do té matcha da man de Guillermo Rizzotto, practicante dende hai 12 anos desta lonxeva tradición.

O camiño do té é unha disciplina espiritual e artística que representa a quintaesencia da cultura xaponesa. A utilización dos diversos instrumentos durante a práctica do ritual supón unha auténtica expresión do seu espírito de sabedoría ancestral.

Durante a cerimonia do té pódense apreciar os distintos estilos de cerámica, os instrumentos artesanais de forxa e bambú, a caligrafía e a ornamentación floral. Cada un destes obxectos cumpren unha función concreta dentro do ritual en torno ao matcha, un té verde en po e bebida ancestral desta cerimonia, que se serve precedido dun doce.

A presentación consistirá nunha breve introdución verbal, a continuación contemplaremos a cerimonia do té, a cargo de Guillermo e Chiyu, e poderemos desfrutar da xestualidade, os quimonos, o momento ritual e a simbólica purificación dos obxectos. Despois da cerimonia abrirase o espazo a preguntas e respostas onde poderás consultar todas as inquietudes e curiosidades desta práctica tradicional considerada un “do”: un Camiño.